CaspianLife, 26 наурыз — Ақтаулық шенеуніктер бекіре мен итбалық үшін қала белсенділерімен дауласып жатыр.
Жақында жағалауда осы балықтардың құны 300 миллион теңгелік шағын мүсіндері пайда болды. Енді сол мүсіндерге осыншама қаржыны кімнің төлегені анықталып жатыр.
Шенеуніктердің жоспары бойынша қала тұрғындарына тарту ретінде бекіре мен итбалық мүсіндері, әткеншектер мен жұлдызды аспан инсталляциясы ұсынылған. Қала әкімдігі мүсіндерді жасауға демеушілердің ақша төлегенін мақтанышпен хабарлады. Демеушілер бұл туындыларды жасауға 300 миллион теңге шығындаған екен.
Алайда жергілікті журналистер мемлекеттік сатып алу сайтында күмән туғызған көп деректі анықтаған – дәл осы сомадағы қаржы қаланы безендіруге жұмсалған деп көрсетілген. Қоғам белсенділері бұл қыруар ақша бюджеттен жұмсалған болуы мүмкін деп күдіктенеді, бірақ шенеуніктер олардың күмәнін жоққа шығаруда.
«Біз меценаттың ақшасын пайдаландық. Ол біздің есепшотымызға ақша жіберді. Содан кейін мемлекеттік сатып алу сайты арқылы заңнама аясында 2015 жылғы 4 желтоқсандағы «Мемлекеттік сатып алу туралы» Заңының 39-бабы 3-тармағы 3-тармақшасына сәйкес бір көзден алу тәсілімен конкурс ұйымдастырдық. Өйткені бұл мердігердің авторлық құқығы болды», — деп түсіндірді Ақтау қаласы әкімдігінің тұрғын үй-коммуналдық шаруашылық бөлімінің басшысы Болат Байбозов.
