CaspianLife, 1 шілде — Атырауда «Жасыл ел» жастар еңбек жасағының ХІХ маусымының ашылуына орай плоггинг акциясы ұйымдастырылды, — деп хабарлайды caspianlife.kz. Яғни қала, аудандардағы оқу орындарының жастары «Тентектер», «Қырандар», «Нұр», «Жасыл желек» деген 4 командаға бөлініп, Жайық жағалауын қоқыстан тазалады. Нәтижесінде «Тентектер» аз ғана уақыттың ішінде 21 қапшық қалдық жинап, жеңімпаз атанды. Еңбек жасағының мүшелері әрі көңіл көтеріп, әрі пайдалы іс істегендеріне риза. Іс-шараның өтуіне Атырау облыстық ішкі саясат басқармасының қызметкерлері себепші болды. Олар осы жолы « Жасыл ел» қатарына шалғай ауылдағы жасөспірімдерді де тартыпты. «Жасыл ел» жастар еңбек жасағының мүшелері тамыздың 30-ына дейін жұмыс істейді. Осы мерзім ішінде барлығы 1760 жасты еңбекпен қамту жоспарланған. Әзірге 565 адам өтініш беріпті. Олар 70 000 теңге көлемінде жалақы алады.
«Жасыл ел» жастар еңбек жасағының ашылу салтанаты өтті
