CaspianLife, 9 желтоқсан. Атырау қаласының №2 сотында Т., К., И., У. есімді айыпталушыларға қатысты қылмыстық іс қаралды. Олар Атырау облысы қылмыстық-атқару жүйесі департаментінің №75 мекемесінің (тергеу изоляторы) қызметкерлеріне зорлық-зомбылық көрсету бойынша, алдын ала сөз байласу арқылы және топ болып айыпталды.
№2 соттың хабарлауынша, айыпталушылар Т., К., У., И. өздерінің таныстарының мүддесін қорғаған, олар Атырау қаласындағы №75 мекемесінде (тергеу изоляторы) қамауда болған. Аталған азаматтар тергеу изоляторының екі қызметкерін зорлық-зомбылықпен қорқытқан. Осы мақсатта айыпталушылар биылғы жылдың ақпан айында чат құрып, онда тергеу изоляторының екі қызметкеріне физикалық және психологиялық қысым көрсету жоспарларын талқылаған. Соттың хабарламасында бұл әрекеттер «…өздерінің таныстарының мекемедегі режимдік шараларды тоқтату мақсатында жасалғаны» атап көрсетілген.
Одан кейін олар өз жоспарларын іске асыруға көшкен – 23 ақпанда, шамамен сағат 23:00-де олар тергеу изоляторының бір қызметкерінің үйіне (мекенжайды алдын ала білген) келіп, оны көшеге шақырған. Сондай-ақ, телефон арқылы тергеу изоляторының екінші қызметкері де шақырылған. Сот берген ақпаратта барлық егжей-тегжейлер ашылмаған, тек айыпталушылардың екі қызметкерге «психологиялық қысым көрсетіп, зорлық-зомбылықпен қорқытқандығы» ғана нақтыланған. Осы әдіс арқылы олар өздерінің таныстарына тергеу изоляторында жұмсартылған режим талап еткен. Бірақ, ақырында өздері сот алдында жауап беруге мәжбүр болды.
Атырау қаласының №2 сотының баспасөз релизі бойынша:
«Прокурор айыпталушылар Т., К., У.-ға 8 жыл 6 ай бас бостандығынан айыру жазасын, ал И.-ға 55-бабының 2-тармағы 2) бөлімі бойынша 6 жыл 8 ай бас бостандығынан айыру жазасын тағайындауды сұрады. Зардап шеккендер (тергеу изоляторы қызметкерлері – CaspianLife ескертпесі) прокурордың ұстанымымен келісіп отыр.
Айыпталушылар өз әрекеттерінің қылмыс екенін білмегендерін айтып, оларды түрмеге қамамауды сұрады.
Қорғаушылар айыпталушылардың іс-әрекетін дұрыс қайта саралауды немесе оларды ақтауды, не қылмыстық істі тоқтатуды талап етті.
Жазаны тағайындау кезінде сот айыпталушылар Т., К., У.-ның қылмыстық жауапкершілігін жеңілдететін немесе ауырлататын мән-жайларды анықтамады. Айыпталушы И.-ның кәмелетке толмаған балаларының болуы сотпен жеңілдететін мән-жай ретінде есептелді. Ауырлататын мән-жайлар анықталған жоқ.
Айыпталушылар Т., К., У. ҚР ҚК 429-бабының 3-бөлігі бойынша кінәлі деп танылып, әрқайсына 8 жыл бас бостандығынан айыру жазасы тағайындалды.
Айыпталушы И. ҚР ҚК 28-бабының 4-бөлігі, 429-бабының 3-бөлігі бойынша кінәлі деп танылып, жеңілдететін мән-жайлар және ауырлататын мән-жайлар болмағандықтан, ҚР ҚК 55-бабының 2-тармағы 2) бөлімі негізінде 6 жыл 8 ай бас бостандығынан айыру жазасы тағайындалды.
Сот үкімі әлі заңды күшіне енген жоқ».