CaspianLife, 6 желтоқсан. Мемлекет басшысы Ұлттық қауіпсіздік комитетінің (ҰҚК) төрағасы Ермек Сағымбаевты қабылдады.
Қазақстан Республикасы Президентінің баспасөз қызметінің хабарлауынша, Қазақстанның арнайы қызмет басшысы Ермек Сағымбаев жыл басынан бері ведомствоның жұмысының негізгі нәтижелері мен алдағы кезеңге арналған міндеттері туралы есеп берді. ҚР ҰҚК төрағасының баяндамасынан:
– Ұлттық қауіпсіздік органдары төрт терактінің дайындық кезеңінде жолын кесті. Терроризм мен экстремизмге қатысы бар деп танылған 84 адам сотталды, 44 адам ұсталды;
– Сирия мен Түркиядан терроризм сипатындағы қылмыстар жасады деген күдікпен іздеуде жүрген алты қазақстандық экстрадицияланды, олардың екеуі сотталды;
– Қазақстанға терроризм мен экстремизмге қатысы бар 824 шетелдіктің кіру әрекеті тоқтатылды;
– Ішкі істер министрлігімен бірлесіп, 19 ұйымдасқан қылмыстық топтың қызметі бейтараптандырылды, 60 адам қамауға алынды;
– Заңсыз айналымнан 505 атыс қаруы, 5 қолдан жасалған жарылғыш құрылғы, 45 жарылыс пакеті және 15 046 оқ-дәрі тәркіленді;
– Есірткі өндіретін 33 зертхана, сондай-ақ олардың тасымалына арналған 35 халықаралық және 31 өңірлік арна жойылды;
– Заңсыз айналымнан 3,2 тонна есірткі және психотроптық заттар, 4,5 тонна көкнәр сабанының шикізаты, сондай-ақ 18,8 тонна прекурсор тәркіленді;
– Есірткі және психотроптық заттардың заңсыз айналымы үшін 162 адам сотталды;
– Экономикалық қауіпсіздікті қамтамасыз ету және жүйелі сыбайлас жемқорлыққа қарсы іс-қимыл шеңберінде мемлекетке келтірілетін 1,6 трлн теңгеден астам шығынның жолы кесілді, 315 млрд теңге мемлекеттік бюджетке қайтарылды. Сыбайлас жемқорлық және онымен байланысты құқық бұзушылықтар үшін 46 адам сотталды;
– Мемлекеттік шекарада 55 мыңға жуық құқық бұзушы ұсталды, қару-жарақ, оқ-дәрі, есірткі және басқа да тыйым салынған заттарды алып өтудің 1 300-ден астам әрекетінің жолы кесілді;
– Шекара арқылы 18 млрд теңге көлемінде валюта мен 66 млрд теңге сомасындағы тауарлардың заңсыз өткізілуіне жол берілмеді. Заңсыз көші-қонның 20 арнасы жойылды;
– Мемлекеттік органдардың ақпараттық жүйелеріне 552 миллионнан астам кибершабуыл және 6 мың DDoS-шабуылдың алдын алынды.
Кездесу қорытындысы бойынша Мемлекет басшысы ұлттық қауіпсіздік органдарының қызмет бағыттары бойынша бірқатар тапсырмалар берді.
(Қазақстан Республикасы Президентінің баспасөз қызметінің ақпараты бойынша)