Caspian Life, 21 қараша. Атырауда жасөспірімдер арасында суицид көбейген. Ал буллингке ұшыраған балалар туралы жиі айтылғанмен нақты дерек жоқ. Яғни полицияға «балам зәбір көріп жатыр» деп ешкім арыз түсірмейтін көрінеді.
Бұл Amanat партиясы Атырау облыстық филиалы жанындағы жастарды қолдау жөніндегі аймақтық кеңес отырысында айтылды. Былтыр 4 жасөспірім өз еркімен өмірден кетсе, биыл 11 жеткіншек суицид жасаған. Айта кетерлігі – балалардың не себепті мұндай қадамға барғандығы көп жағдайда анықталмайды.
Білім беру басқармасындағылар мәселені алға қарай психологиялық көмек көрсету орталығын ашу арқылы шешпек ниетте. Ал буллингке келсек полицейлер бұл қоғамдағы өзекті мәселелердің бірі болғанымен, ол үшін қылмыстық немесе әкімшілік жауапкершілік көзделмегенін айтады. Тек болған факті бойынша тентектің іс-әрекеті сараланады. Сонымен жылы жабылады.
Жыл басынан бері буллинг белгісі бар 8 факт анықталған.
Дулат ХАМЗИН, Атырау облысы білім беру басқармасының бөлім басшысы
Жалпы республика бойынша буллинге мониторинг жасалмайды. Мысалы камера арқылы анықталған жағдайда полиция департаментіне түседі. Мысалы мына баланы ұрды соқты деген сияқты. Біз сол бойынша жұмыс жасаймыз. Мәселен, Бином мектебінде болып жатқан жағдайда көріп жатырмыз әлеуметтік желіде. Ол мәселе инстаграмда жарияланғанмен ол нақты ресми түрде тіркелген жоқ.
Атырау облыстық полиция департаменті мәліметінше, биыл жасөспірімдер 65 қылмыс жасапты. Былтыр бұл көрсеткіш 39 болған. Көбісі ұрлық жасағаны, кейбірі басқа да қылмысқа қатысы болғаны үшін шаталған.
