CaspianLife, 25 мамыр — Атырауда заманауи оңалту орталығы салынады деп хабарлайды сaspianlife.kz Атырау облыстық әкімдігінің баспасөз қызметіне сілтеме жасап.
150 орындық оңалту кешенінің құрылысы биыл басталмақ. Жалпы аумағы 12 мың шаршы метрден асады. 3 қабатты ғимарат барлық заманауи талапқа сай болады деп жоспарланып отыр. Жаңа орталықта жылына 1500-ден аса адам ем-дом алуға мүмкіндік жасалмақ. Облыстық құрылыс басқармасының мәліметінше, орталықтың жобалау-сметалық құжаттамасы толық жасақталған. Осы жобаға сәйкес, мұнда сауықтыру-жүзу бассейні, спорт зал, мәжіліс залы және техникалық ғимарат пен жылыжай қарастырылған. Ғимараттың бірінші қабатында дәрігерлік бөлмелер мен оңалту-жаттығу залы, УЗИ кабинеті және дәріхана да ойластырылған. Сондай-ақ, жобада 125 орындық асхана бар. Ал, ғимараттың екінші қабатында науқастарды оңалтуға арналған үш аумақ болады. Олар медициналық оңалту, әлеуметтік оңалту және психологиялық оңалту боп бөлінеді. Үшінші қабатта тұз шахтасы, электр сәулемен емдеу, ингалятор аумағы, физиологиялық және механикалық емдеу, сумен және инемен емдеу секілді терапиялық бөлмелер бар.
Қазіргі уақытта құрылыс жұмыстарын жүргізетін мердігерді анықтау мақсатында мемлекеттік сатып алу порталында тендер жарияланған.
