CaspianLife, 26 қаңтар — Ақтауда психикалық орталық пациенттері аштық жариялап, өз ауыздарын өздері тігіп тастады. Олар орталық басшылығы мен қызметкерлеріне құқығымызды бұзды деген айып тағып отыр. Және әлеуметтік жағдайлары да мәз емес. Берілетін тамақ та құнарсыз көрінеді, деп хабарлайды CaspianLife.
«Оңтайландыру бағдарламасы жұмыс жасамайды мүлде, жоқ деп айтуға болады. Бізге беретін астарын тамақ деп айту қиын. 50 грамм деп жазғанмен, алдымызға келетін тамақтың түріне де қарау қорқынышты. Сұмдық!» — деді пациент.
Науқастар соңғы сегіз айдан бері халіміз мүшкіл болған соң, қарсылық ретінде амалсыздан аузымызды тігуге мәжбүр болдық дейді. Өйткені, бас көтеріп, жағдайды айтқандарды қызметкерлер қорқытып, ұрып-соққан.
«Санитарлар бізді әуелі қорқытты, кейін ұрып-соқты. Басымызды қабырғаға ұрған кездері де болды. Олардың іс-әрекеті бейнебақылау камераларына түспейді. Бұл жерде бізді ешкім тыңдағысы, естігісі келмейді» — деді пациент.
Қазір орталыққа жаңа басшы келген. Мән-жайды анықтауға уәде берді. Бірақ ол осында ем алып жатқан азаматтардың өзгелер секілді еместігін ескеруді сұрайды.
«Мұндағы науқастар іштегі қызметкерлер мен күзетшілерді ұрып жіберген сәттер болған. Пациенттердің арасында 3-4 рет сотталып келгендер бар. Олар өздеріне көп көңіл бөлінгенін қалайды» — деді Маңғыстау облыстық психикалық орталықтың директоры Мәди Тоқанов.
Орталық басшылығы пациенттердің шағымы бойынша қызметтік тексеріс жүргізілетінін айтты. Және науқастарды жұмыспен қамту туралы жергілікті атқарушы органға ұсыныс жолдауды жоспарлап отыр. Қазір мұнда есірткі мен ішімдікке тәуелді 60-қа жуық адам ем қабылдап жатыр.