CaspianLife, 25 қаңтар — Қаладағы №21 Жамбыл атындағы орта мектеп оқушыларының ата-аналары балалардың онлайн оқу тәртібіне көшіріліп, мектеп ғимаратының зарарсыздандырылуын талап етуде, деп хабарлайды CaspianLife.
Оған туберкулезбен ауыратындығы белгілі болған оқу орны басшысының іс-әрекеті себеп. Өйткені директор өзінің сырқаты туралы біле тұра, жұмысқа келіп-кетіп жүрген.
«Мен мектептің дұрыстап тұрып зарарсыздандырылуын талап етемін. Ғимарат таза, ұстаздардың бәрі сау демей көңіліміз жайланбайды. Және мұны эпидемиологтардың растауы қажет. Ал оған дейін балаларды сабаққа жіберудің мәні жоқ деп есептеймін» — деді ата-ана Гүлнар Өтебалиева.
«Біз балаларымыз үшін алаңдап отырмыз. Мектеп директорының мыңнан астам оқушының тағдырын еш ойламастан, ауырғанын ешкімге айтпай үйде емделуі мүлде ақылға сыймайды. Ал балалар жұқтырып алса не болмақ? Менің балам 13 те. Оны рентгенге түсіруге болмайды екен. Ал енді оның Кох таяқшасын жұқтырған-жұқтырмағанын қалай білемін?» — деді ата-ана Леонид Ким.
Ал эпидемиологтар өздерінің тарапынан мектептің залалсыздандырылғанын айтады. Науқаспен қарым-қатынаста болған 125 қызметкер флюорографиялық тексеруден өткен.
«Басқармамыздың тарапынан ошақ анықталды екі жерде . Біреуі мектеп болып саналады. Біреуі үй болып саналады. Сол ошақтарға қортыныды дезинфекция жасауға №129 шы санитарлық бұйрықпен санитарлық қаулы шығарып ол каулыны лабораторияға жібердік. Сол лабораторияға тапсырма ретінде берілді каулы. Соның негізінде мектеп директорының орынбасарымен барып мектеп дезинфекця жасалды. Негізінде флюграфиялық тексеріс мұғалімдер бір жыл сайын өтуге тиісті. Бірақ енді өзінің денсаулығына қарай ұстанатын болса, қорқам десе алты ай сайын тексерілуге болады. Басқа да тест бар. Диаскент тест дейміз оны да тапсыруға болады» — деді Атырау қалалық санитариялық-эпидемиологиялық бақылау басқармасы басшысының орынбасары Мұрат Хамзин.
Бұл мәселеге келгенде қалалық және облыстық білім беру басқармасының басшылығы – басын құмға тыққан түйеқұстың әрекетін жасап, тып-тыныш отыр. Тіпті балаларының денсаулығына алаңдап, ала өкпе болып жүрген ата-аналармен кездесуді көп көргені өз алдына, телеарна тілшілерінің сауалдарын да жауапсыз қалдырды. Ал «мектеп басшылығынан рұқсат жоқ» деген күзетшінің іс-әрекеті мынау.
Айтпақшы облыстың бас ұстазы «ақсақ қой түстен кейін маңырайды» дегеннің керімен арада бақандай 4 күн өткенде ғана мектепте ата-аналармен жиылыс өткізбек. Бейресми ақпаратқа сүйенсек, өзінің іс-әрекетімен ел-жұртты шулатқан директор мырза қазір Алматыда емделіп жатыр. Тыныш жатпай, өзіне қатысты ақпараттың жалған екендігін айтып, оны таратқандарды сотқа бермек ниеті бар көрінеді.
