CaspianLife, 2 желтоқсан — Маңғыстау облысындағы жалғыз жоғарғы оқу орнының оқытушылары баспанасыз қаламыз деп қорқып отыр. Олар өңірге осыдан 15 жыл бұрын білім сапасын арттыру мақсатында келген болатын.
Сол кезде басшылық мамандарға берілген пәтерді кейін олардың өз аттарына жекешелендіруге уәде етіпті. Бірақ, уәде орындалмады. Сондықтан оқытушылар сотқа жүгінген.
«Тұрғын үй комиссиясының төрағасы университет ректоры Берік Бақытжанұлы Ахметов. Бізге ешқандай жауап берілмеді. Бірақ, олар аппеляция беріп отыр», — дейді оқытушылардың бірі Роза Махамбетвова.
Сот барлық деректі қарай отырып, оқытушылардың шағымын қанағаттандырып, шешім шығарды.
«Директорлар кеңесі мен тұрғын үй комиссиясының шешімі заңсыз деп танылды. Сондай-ақ сот жауапкерге кеткен қателіктерді жоюды міндеттеді. Пәтерлер қалдық құны бойынша жекешелендіру жолымен талапкерлерге берілуі тиіс. Шешім заңды күшіне әлі енген жоқ», — деді Ақтау қалалық №2 сотының судьясы Қуандық Акеров.
Алайда, ЖОО басшылығы сот шешімін орындауға асығар емес. Өйткені оқу орнының меншік түрі акционерлік қоғам болып ауысуы бұған мүмкіндік бермей тұрған көрінеді.
«Біз бұл ережелер бойынша жекешелендіруді жүргізе алмаймыз, себебі заңсыз болады. Сот шешімін дәл қазір орындайтын болсақ, бізде нақты механизм жоқ. Жекешелендіру туралы шешімді алқалы органның немесе құрылтайшының қайсысы қабылдайтынын да білмейміз. Әзірге бұл жағдай түсініксіз», — Ш.Есенов атындағы Каспий мемлекеттік технологиялар және инжиниринг университеті ректорының кеңесшісі Сабыр Түменбаев.
Қалалық соттың шешімінен кейін университет басшылығы аппеляциялық шағым түсірген. Ал талапкерлер болса басшыларымыз уақыт созып жүр дейді. Оқытушылардың барлығының да ғылыми атағы бар, зейнет жасына жақындаған жандар. Егер университет басшылары сот шешімін орындамаса олар еңбектің зейнетін көрер шақта далада қалғалы тұр.
