СaspianLife, 2 тамыз – Исатайлық тәрбиеші республика бойынша өткен «Мектепке дейінгі ұйымның үздік педагогі» байқауында «Үздік педагог» атанды деп хабарлайды Өңірлік коммуникациялар қызметі.
Аталмыш байқауға еліміздің түкпірінен 17 тәрбиеші қатысты. «Нұршуақ» бөбекжай-бақшасының тәрбиешісі Қарақат Жақсымбетова «Баланы оқыту мен дамыту процесінде ментальді арифметиканы игерудің тиімділігі» тақырыбында шығармашылық жұмыс қорғаған.
«Ережеге сай «Мен – педагогпын» атты кезеңде әрбір қатысушыға берілген уақыты бойынша онлайн сұхбат алаңына шықтым. Өз шығармашылық жұмысымды қорғап, байқаудың қазылар алқасы қойған сұраққа жауап бердім. «Педагогтің Е-портфолиосы» және «Балалармен өткізілген қызықты сәт» секілді бөлімдері бойынша құжат электронды түрде жіберілді», — дейді жеңімпаз.
